புலிகளுடனான யுத்தத்தை முடிவுக்கு கொண்டுவந்த பொன்சேகா சிறந்த இராணுவ வீரர், `ஜெனரல்` பதவிப்பட்டம் கிடைக்காது - லக்ஷ்மன் யாப்பா அபேவர்தன...

இலங்கை இராணுவ முன்னாள் தளபதி சரத் பொன்சேகா, சிறந்த போர் வீரராவார். அவரது திறமையைக் கருத்திற் கொண்டும், அவரது இராணுவ சேவைக்கு மதிப்பளிக்கும் வகையிலுமே ஜனாதிபதி மஹிந்த ராஜபக்ஷ, பொன்சேகாவுக்கு மன்னிப்பு வழங்கினார் என்று அரசாங்கம் இன்று தெரிவித்துள்ளது.

'விடுதலைப்புலிகளுடனான யுத்தத்தை முடிவுக்கு கொண்டுவருவதற்கு சரத் பொன்சேகாவின் தலைமைத்துவம் சிறந்து விளங்கியது. அவர் என்ன பிழைகள் செய்தாலும் அவர் நாட்டுக்காக ஆற்றிய சேவைகள் அளப்பரியன.

அதனாலேயே யுத்த வெற்றியின் மூன்றாம் ஆண்டில் அவர் விடுதலை பெற வேண்டும் என்று ஜனாதிபதி மன்னிப்பு வழங்கினார்' என்று அமைச்சரவையின் பதில் பேச்சாளரும் பிரதியமைச்சருமான லக்ஷ்மன் யாப்பா அபேவர்தன தெரிவித்தார்.

அமைச்சரவையின் தீர்மானங்களை அறிவிக்கும் வாராந்த ஊடகவியலாளர் மாநாடு, இன்று வியாழக்கிழமை முற்பகல் இடம்பெற்றது. இதன்போது சரத் பொன்பொன்சேகாவுக்கு மன்னிப்பு வழங்கக் காரணம் யாது? என ஊடகவியலாளர்கள் சிலர் அமைச்சரிடம் கேள்வி எழுப்பினர். இதற்கு பதிலளிக்கும் போதே அவர் மேற்கண்டவாறு கூறினார்.

அங்கு தொடர்ந்தும் கருத்து தெரிவித்த பிரதியமைச்சர்,

'இராணுவ நீதிமன்றத்தினால் வழங்கப்பட்ட தீர்ப்பினை நிராகரிக்கும் வகையில் இந்த நாட்டில் ஆட்சியில் இருந்த எந்தவொரு ஜனாதிபதியும் நடந்துகொள்ளவில்லை. சரத் பொன்சேகா விடயத்திலும் ஜனாதிபதி மஹிந்த ராஜபக்ஷ அவ்வாறே நடந்து கொண்டுள்ளார்.

இந்நிலையில், இராணுவ நீதிமன்ற தீர்ப்பின் பிரகாரம் பறிக்கப்பட்ட, முன்னாள் இராணுவ தளபதி சரத் பொன்சேகாவின் 'ஜெனரல்' பதவிநிலை மீண்டும் வழங்கப்படுவதென்பது சாத்தியப்படாத விடயமே' என்று அமைச்சரவையின் பதில் பேச்சாளரும் பிரதியமைச்சருமான லக்ஷ்மன் யாப்பா அபேவர்தன தெரிவித்தார்.

முன்னாள் இராணுவ தளபதி சரத் பொன்சேகாவை 'ஜெனரல் பொன்சேகா' என்று அழைக்க முடியுமா? என்று  ஊடகவியலாளர்கள் சிலர், அமைச்சரிடம் கேள்வி எழுப்பினர். இதற்கு பதிலளிக்கும் போதே அவர் மேற்கண்டவாறு கூறினார்.

'சரத் பொன்சேகா இராணுவ தளபதியாக பதவி வகித்த காலப்பகுதியில் இராணுவ நீதிமன்றத்தின் கீழ் சுமார் 7,500பேருக்கு தண்டனை பெற்றுக்கொடுத்துள்ளார். அப்படிப்பட்ட ஒருவர் இராணுவ நீதிமன்றத்தின் தீர்ப்பு குறித்து நன்றாக அறிந்திருப்பார்.

சிறைத்தண்டனை அனுபவித்துவரும் ஒருவருக்கு மன்னிப்பு வழங்கும் அதிகாரம் ஜனாதிபதிக்கு உள்ளது. இதன் பிரகாரமே சரத் பொன்சேகாவுக்கு மன்னிப்பு வழங்கப்பட்டுள்ளது.

ஜனாதிபதியின் இந்த மன்னிப்பின் மூலம் தேர்தலுக்கான உரிமை தவிர்ந்த அனைத்து உரிமைகளும் சரத் பொன்சேகாவுக்கு கிடைக்கப்பெறுகின்றது. இருப்பினும் இராணுவ நீதிமன்ற தீர்ப்பு விடயத்தில் ஜனாதிபதி ஒருபோதும் தலையிட மாட்டார்.

அதனால், இராணுவ நீதிமன்றினால் சரத் பொன்சேகாவிடமிருந்து பறிக்கப்பட்ட 'ஜெனரல்' பதவி மீண்டும் கொடுக்கப்பட வாய்ப்பு இல்லை' என்று கூறினார்.