தன் மீதான தாக்குதலுக்கு உதவிய பெண்ணை மன்னிக்கத் தயார் என்கிறார் அமைச்சர் டக்ளஸ்...

இலங்கையில் கடந்த 2004 ம் ஆண்டில் தன் மீது நடத்தப்பட்ட தற்கொலைத் தாக்குதல் நடவடிக்கைக்கு உதவிய பெண்ணை மன்னிக்க தான் தயார் என்று அமைச்சர் டக்ளஸ் தேவானந்தா தெரிவித்துள்ளார்.

கொழும்பு மேல் நீதிமன்றத்தில் இது குறித்த வழக்கு விசாரணை ஒன்றில் நேரில் ஆஜராகிய போதே அமைச்சர் இதனைத் தெரிவித்துள்ளார்.

2004 ஆம் ஆண்டு அமைச்சர் டக்ளஸ் தேவானந்தா மீது தாக்குதல் நடத்திய தற்கொலையாளியை அங்கு அழைத்து வந்ததாகக் கூறப்படும் சத்தியலீலா என்னும் பெண்மணி மீதே இந்த வழக்கு விசாரணை நடக்கிறது.

இந்த வழக்கில் ஆஜராகிய அமைச்சர், அந்தப் பெண்மணி தனது அலுவலகத்தில் முதலில் பணியாற்றியவர் என்றும், விடுதலைப்புலிகளின் நிர்ப்பந்தம் காரணமாகவே அவர் தற்கொலைத் தாக்குதலாளியை தன்னை தாக்குவதற்கு அழைத்து வந்ததாகத் தான் நம்புவதாகவும், ஆகவே அவரை மன்னிக்க தான் தயாராக இருப்பதாகவும் கூறியுள்ளார்.

எவரையும் பழிவாங்கும் நோக்கம் தனக்கு என்றும் கிடையாது என்றும், அந்தப் பெண்மணி ஏற்கனவே விளக்கமறியலில் பல ஆண்டுகளைக் கழித்துவிட்டார் என்பதால் அவர் மீது தனக்கு அனுதாபம் உண்டு எனவும் செய்தியாளர்களிடம் அமைச்சர் டக்ளஸ் கூறியுள்ளார்.

அதேவேளை வழக்கில் முடிவான தீர்ப்பை வழங்க வேண்டியது நீதிமன்றத்தின் கையிலேயே இருக்கிறது என்றும் அமைச்சர் குறிப்பிட்டுள்ளார்.