சங்கக்காராவுக்கு ஊடக தொடர்பு குறித்த அறிவுரைக் கடிதம் அனுப்ப இலங்கை வாரியம் முடிவு...

இலங்கை வீரர்கள் ஊடகங்களுடன் தொடர்பு கொள்வது குறித்து மேலும் இறுக்கமான நடவடிக்கைகளை மேற்கொள்ள இலங்கைக் கிரிக்கெட் வாரியம் தீர்மானித்துள்ளது.

இதன்படி ஊடகங்களுடன் நேர்காணல்களிலோ, கலந்துரையாடல்களிலோ ஈடுபட விரும்பும் இலங்கைக் கிரிக்கெட் வீரர்கள், இலங்கைக் கிரிக்கெட் வாரியத்தின் தலைமை நிர்வாக அதிகாரியான அஜித் ஜெயசேகரவிடம் அனுமதியைப் பெற்றுக்கொள்ள வேண்டும்.

இதற்கான சட்டதிட்டங்களை இலங்கைக் கிரிக்கெட் வாரியத்தின் சட்டத்தரனி ஹர்ஷா அமரசேகரவிடம் கலந்துரையாடி இயற்றவுள்ளனர். அந்த நடவடிக்கை நிறைவடைந்த பின்பு அனைத்து ஒப்பந்த வீரர்களுக்கும் இந்தக் கடிதம் அனுப்பப்படவுள்ளதாகத் கூறப்படுகிறது.

வெளியாகும் தகவல்களின் அடிப்படையில் இந்தத் திட்டம் வீரர்களின் ஒப்பந்தத்திலும் இடம்பெற வாய்ப்புக்கள் உள்ளதாகத் தெரிவிக்கப்படுகிறது. வீரர்களுக்கான புதிய ஒப்பந்தங்கள் யூன் 1ம் திகதி ஆரம்பிக்கவுள்ள பாகிஸ்தான் தொடருக்கு முன்பு வழங்கப்படும் என்று எதிர்பார்க்கப்படுகிறது.

மேலும், இலங்கை அணியின் துடுப்பாட்ட வீரரும், முன்னாள் அணித்தலைவருமான குமாரா சங்கக்காராவிற்கு கடிதமொன்றை அனுப்பவும், இலங்கைக் கிரிக்கெட் வாரியம் தீர்மானித்துள்ளது. ஊடகமொன்றிற்கு அவர் வழங்கிய பேட்டி தொடர்பாகவே இந்தக் கடிதம் அனுப்பப்படவுள்ளது.

நடைமுறைகளைச் சரியாகப் பின்பற்றுமாறு அவருக்கு நினைவுபடுத்தியே இந்தக் கடிதம் அனுப்பப்படவுள்ளதோடு, எதிர்காலத்தில் இவ்வாறான நடவடிக்கைகள் ஏற்றுக் கொள்ளப்படமாட்டாது எனவும் தெரிவிக்கப்பட்டுள்ளது.

அது எந்தப் பேட்டி என்று குறிப்பிடப்படாத போதிலும், தான் உலகக்கிண்ணத்தையடுத்து பதவி விலகியபோது ஏஞ்சலோ மேத்யூஸ் அணித்தலைவராக நியமிக்கப்பட்டிருக்க வேண்டும் என்று தெரிவித்த கருத்தே இலங்கைக் கிரிக்கெட் வாரியத்தின் கோபத்திற்குள்ளாக்கியிருக்கிறது என்றுக் கருதப்படுகிறது.

ஏற்கனவே கடந்தாண்டு இலங்கை வாரிய நிர்வாகத்தின் வெளிப்படைத்தன்மை குறித்த சார்ள்ஸ் கௌட்ரி உரையை இலண்டன் லோர்ட்ஸில் நிகழ்த்தியபோதும், இலங்கைக் கிரிக்கெட் வாரியத்தின் நெருக்கடிக்கு உள்ளானார் என்பது குறிப்பிடத்தக்கது.