ஸ்ரீலங்கா பிறீமியர் லீக் தொடரில் இந்திய வீரர்கள் பங்கேற்க வாய்ப்பு உள்ளது: பி.சி.சி.ஐ...

எதிர்வரும் ஓகஸ்ட் மாதத்தில் நடைபெறவுள்ள ஶ்ரீலங்கா பிறீமியர் லீக் தொடரில் இந்திய வீரர்கள் விளையாடுவதற்கான வாய்ப்புக்கள் ஏற்பட்டுள்ளது என்று இந்திய கிரிக்கெட் கட்டுப்பாட்டு வாரிய  (பி.சி.சி.ஐ) தலைவர் என். ஸ்ரீனிவாசன் தெரிவித்துள்ளார்.

கடந்த வருடம் ஶ்ரீலங்கா பிறீமியர் லீக் தொடரை நடத்துவதற்கு இலங்கைக் கிரிக்கெட் வாரியம் முன்வந்த போது இந்திய வீரர்கள் அத்தொடரில் விளையாடுவதை அனுமதிக்க முடியாது என்று இந்தியக் கிரிக்கெட் கட்டுப்பாட்டு வாரியம் அறிவித்தது.

ஶ்ரீலங்கா பிறீமியர் லீக் தொடரை நடத்துவதற்காக சமர்செட் நிறுவனத்துடன் இலங்கைக் கிரிக்கெட் வாரியம் மேற்கொண்டிருந்த ஒப்பந்தத்தின் அடிப்படையில் வீரர்களுக்கான ஊதியம் தொடர்பில் தெளிவான நிலைமை இல்லை என்று தெரிவித்தே இந்தியக் கிரிக்கெட் வாரியம் கடந்த வருடம் மறுப்புத் தெரிவித்திருந்தது.

இந்தியக் கிரிக்கெட் வாரியத்தின் மறுப்பினை அடுத்தே ஶ்ரீலங்கா பிறீமியர் லீக் தொடரை கைவிட வேண்டிய தேவை இலங்கைக் கிரிக்கெட் வாரியத்துக்கு ஏற்பட்டது.

இந்தியக் கிரிக்கெட் வீரர்களையும் தாண்டி, இந்திய நிறுவனங்களில் முதலீடு, அனுசரணை ஆகியவற்றை இலங்கைக் கிரிக்கெட் வாரியம் நம்பியிருந்த நிலையில், இந்தியக் கிரிக்கெட் வாரியத்தின் மறுப்பினை அடுத்து அந்நிறுவனங்களும் பின்வாங்கிக் கொண்டதால் இலங்கைக் கிரிக்கெட் வாரியம் கடந்த வருடம் ஶ்ரீலங்கா பிறீமியர் லீக்கை நிறுத்தி வைத்தது.

இந்தாண்டுக்கான தொடரை இலங்கைக் கிரிக்கெட் வாரியம் எதிர்வரும் ஓகஸ்ட் 10ம் திகதி முதல் 31ம் திகதி வரை நடத்த ஏற்பாடு செய்துள்ளது.

இந்நிலையில், இதுகுறித்து பி.சி.சி.ஐ தலைவர் என்.ஶ்ரீனிவாசன் கூறுகையில், இந்திய வீரர்கள் விளையாடுவதை இலங்கைக் கிரிக்கெட் வாரியம் விரும்பி, கோரிக்கை விடுத்தால் அதுகுறித்துப் பரிசீலிக்கத் தயாராக உள்ளதாகத் தெரிவித்தார்.

இதனால் இந்திய வீரர்கள் இத்தொடரில் விளையாட வாய்ப்புள்ளது என்று எதிர்பார்க்கப்படுகிறது.