மாணவர் ஒன்றியச் செயலர் மீதான தாக்குதல்! இதுவரை எவரும் கைது செய்யப்படவில்லை...

யாழ்.பல்கலைக்கழக மாணவர் ஒன்றியச் செயலாளர் தாக்கப்பட்ட சம்பவத்தில் இன்னமும் எவரும் கைது செய்யப்படவில்லையென தெரிவித்துள்ள யாழ்.மாவட்ட பிரதிப்பொலிஸ் மா அதிபர் எரிக் பெரேரா குற்றவாளிகளைக் கண்டு பிடிக்க விசேட பொலிஸர் குழு நியமிக்கப்பட்டுள்ளதாக தெரிவித்துள்ளார்.

யாழ்.பல்கலைக்கழக மாணவர் ஒன்றியச் செயலாளர் நேற்று பல்கலைக்கழகத்திற்கு அண்மையில் வைத்து இனந்தெரியாத நபர்களால் தாக்கப்பட்ட சம்பவம் தொடர்பாக இன்றைய தினம் ஊடகவியலாளர் சந்திப்பொன்று இடம்பெற்றது.

யாழ்.மாவட்ட பிரதிப்பொலிஸ் மா அதிபர் காரியாலயத்தில் நடைபெற்ற இச்சந்திப்பில் கடந்த காலங்களிலும் இவ்வாறான மாணவர்கள் மீதான தாக்குதல் சம்பவங்கள் இடம்பெற்றதாக ஊடகவியலாளர்கள் சார்பில் சுட்டிக்காட்டப்பட்டது.

இதற்கு பதிலளித்த யாழ்.மாவட்ட பிரதிப்பொலிஸ் மா அதிபர் கடந்த காலங்களில் இடம்பெற்ற இச்சம்வங்கள் தொடர்பாக எந்த கருத்தினையும் கூறவிரும்பவில்லை என்பதுடன் தற்போது இடம்பெற்ற இச்சம்வம் தொடர்பாக குற்றவாளிகள் விரைவில் கைது செய்யப்படுவார்கள் எனத் தெரிவித்தார்

மேலும் மிகவிரைவாக சூத்திரதாரிகள் இனங்காணப்படுவார்கள் எனத் தெரிவித்ததோடு இச்சம்பவத்தை விசாரிக்க 10 பேர் கொண்ட விசேட பொலிஸ் குழுவினை நியமித்துள்ளதாக அவர் தெரிவித்தார்.