மும்பை இண்டியன்ஸ் அபார வெற்றி...

ஐபிஎல் தொடரின் இன்றைய முதல் போட்டியில், மும்பை இண்டியன்ஸ் 27 ஓட்டங்கள் வித்தியாசத்தில் கொல்கத்தா நைட் ரைடர்ஸ் அணியை தோற்கடித்தது.

ஐபிஎல் 5 தொடரின் இன்றைய முதல் போட்டி கொல்கத்தாவில் நடைபெற்றது. இப்போட்டியில் கொல்கத்தா நைட் ரைடர்ஸ், மும்பை இண்டியன்ஸ் அணிகள் மோதின.

போட்டியின் நாணய சுழற்சியில் வெற்றி பெற்ற மும்பை அணி முதலில் துடுப்பெடுத்தாட முடிவு செய்தது. துவக்க வீரராக களமிறங்கிய சச்சின் 2 ஓட்டங்களை மட்டும் எடுத்து பிஸ்லாவிடம் கேட்ச் கொடுத்து வெளியேறினார்.

அதன்பிறகு வந்த ரோஹித் சர்மா, துவக்க வீரர் கிப்ஸ் உடன் சேர்ந்து அதிரடியாக ஓட்டங்களை சேர்த்தார். கிப்ஸ் பொறுமையாக ஆட ரோஹித் சர்மா 29 பந்துகளில் அரைசதம் கடந்தார். தொடர்ந்து அதிரடியை தொடர்ந்த ரோஹித் சர்மா 52 பந்துகளில் சதமடித்தார்.

அவருக்கு ஒத்துழைப்பு கொடுத்து ஆடிய கிப்ஸ் அரைசதம் கடந்து ஆறுதல் அளித்தார். கடைசி வரை ஆட்டமிழக்காமல் இருந்த ரோஹித் சர்மா 60 பந்துகளில் 5 சிக்ஸ், 12 பவுண்டரிகள் அடித்து 109 ஓட்டங்களை குவித்தார்.

கிப்ஸ் 2 சிக்ஸ், 7 பவுண்டரிகள் அடித்து 66 ஓட்டங்களை எடுத்தார். நிர்ணயிக்கப்பட்ட 20 ஓவர்களின் முடிவில் மும்பை இண்டியன்ஸ் அணி 1 விக்கெட் இழப்பிற்கு 182 ஓட்டங்களை குவித்தது.

183 ஓட்டங்கள் எடுத்தால் வெற்றிப் பெறலாம் என்ற கடின இலக்கை விரட்டிய கொல்கத்தா நைட் ரைடர்ஸ் அணிக்கு அணித்தலைவர் காம்பிர் முதல் ஓவரிலேயே ஆட்டமிழந்து அதிர்ச்சி அளித்தார். அடுத்த ஓவரில் மற்றொரு துவக்க வீரரான பிஸ்லா 1 ஓட்டம் மட்டுமே எடுத்து முனாப் பட்டேலிடம் கேட்ச் கொடுத்து வெளியேறினார்.

பொறுப்பாக ஆடி வந்த காலிஸ் உடன் ஜோடி சேர்ந்த மனோஜ் திவாரி 4 பவுண்டரிகளை அடித்து 27 ஓட்டங்கள் எடுத்த நிலையில் எல்.பி.டபில்யூ ஆனார். அடுத்து வந்த யூசுப் பதான் வந்த வேகத்தில் ஒரு சிக்ஸ் அடித்து நம்பிக்கை அளித்தார்.

ஆனால் அதன்பிறகு ஓரிரு ஓட்டங்களாக சேர்த்ததால், அணியின் வெற்றி இலக்கை எட்டுவதில் சிக்கல் ஏற்பட்டது. பொறுமையாக அரைசதம் அடித்த காலிஸூம் அதிரடிக்கு முயற்சிக்கவில்லை.

ஜாக் காலிஸ் 60 பந்துகளில் 3 சிக்ஸ், 7 பவுண்டரிகள் அடித்து 79 ஓட்டங்களை சேர்த்து ரோஹித் சர்மாவிடம கேட்ச் கொடுத்து வெளியேறினார்.

கடைசியில் நிர்ணயிக்கப்பட்ட 20 ஓவர்களும் முடிவடைந்த நிலையில் கொல்கத்தா நைட் ரைடர்ஸ் அணி 4 விக்கெட்களை இழந்து 155 ஓட்டங்களை எடுத்தது. இதனையடுத்து மும்பை இண்டியன்ஸ் அணி 27 ஓட்டங்களில் அபார வெற்றிப் பெற்றது.