யூசுஃப் அடித்த கேட்சை தவறவிட்ட பதான்: சகோதர பாசமா???

ஐ.பி.எல் 5 தொடரில் கடந்த 7ம் திகதி கொல்கத்தாவில் நடைபெற்ற போட்டியில் டெல்லி டேர்டெவில்ஸ் அணிக்கெதிரான போட்டியில் 154 ஓட்டங்களை சேஸ் செய்த கொல்கத்தா நைட் ரைடர்ஸ் அணி 6 விக்கெட் வித்தியாசத்தில் அபார வெற்றி பெற்றது.

இப்போட்டியில் கொல்கத்தா நைட் ரைடர்ஸ் அணி துடுப்பெடுத்தாடிய போது வெற்றிக்கு 3 ஓட்டங்கள் தேவைப்பட்ட நிலையில், துடுப்பாட்ட வீரர் யூசுப் பதான் மிட் ஆப் பகுதியில் கொடுத்த எளிய கேட்சை, அவரது சகோதரரும் எதிரணியின் சகலதுறை வீரரான இர்பான் பதான் தவறவிட்டார்.

இர்பான் பதான் தனது அண்ணன் மீதான பாசத்தினால் அந்த கேட்சை பிடிக்க தவறினார் என்ற சர்ச்சை எழுந்தது.

மேலும் புள்ளிப்பட்டியலில் முதலிடத்தில் இருந்த டெல்லி டேர்டெவில்ஸ் அணி 6 நாட்கள் ஓய்விற்கு பின்பு போட்டியில் பங்கேற்றதால் தோல்வியைத் தழுவியதாக குற்றச்சாட்டு எழுந்தது. ஆனால் இந்த குற்றச்சாட்டுகளை இர்பான் பதான் மறுத்துள்ளார்.

இது குறித்து இர்ஃபான் பதான் கூறுகையில், 6 நாட்கள் ஓய்விற்கு பிறகு போட்டிகளில் பங்கேற்றதால், தோல்வியடைந்ததாக கருதுவதை என்னால் ஏற்றுக் கொள்ள முடியவில்லை. ஏனெனில் போட்டிகள் இல்லாத நிலையிலும், நாங்கள் வழக்கமான பயிற்சியில் ஈடுபட்டோம்.

நான் சிறந்த கேட்ச் பிடித்ததற்கான ”கார்பன் கமால் கேட்ச்” பாராட்டை பெற்றுள்ளேன். ஆனால் அதன்பிறகு 3 முறை கேட்ச் பிடிக்க தவறி உள்ளேன். யூசுஃப் பதான் கொடுத்த எளிய கேட்ச் பிடிக்க தவறியது குறித்து, டேவிட் வார்னரிடம் ஆலோசித்தேன்.

எனது சகோதரனின் கேட்ச்சைப் பிடிக்க தவறிய போதே, பலரின் குற்றச்சாட்டிற்கு ஆளாவேன் என்று நினைத்தேன். ஒரு அணி போட்டியில் தோல்வி அடையும் போது, பல சர்ச்சைகள் எழுவது வழக்கம் என்றார்.