ராஜஸ்தான் றொயல்ஸ் 43 ஓட்டங்கள் வித்தியாசத்தில் வெற்றி...

பஞ்சாப் அணிக்கு எதிரான ஐ.பி.எல் லீக் போட்டியில் ராஜஸ்தான் றொயல்ஸ் அணி, 43 ஓட்டங்கள் வித்தியாசத்தில் அசத்தல் வெற்றி பெற்றது.

கிங்ஸ் லெவன் பஞ்சாப், ராஜஸ்தான் றொயல்ஸ் அணிகள் மோதிய ஐ.பி.எல் லீக் போட்டி மொகாலியில் நடந்தது.

நாணய சுழற்சியில் வெற்றி பெற்ற ராஜஸ்தான் அணித்தலைவர் டிராவிட் துடுப்பெடுத்தாட முடிவு செய்தார். இந்த அணியில் முதன் முறையாக டெய்ட் இடம் பிடித்தார்.

ராஜஸ்தான் அணிக்கு இம்முறை, ரகானே 5 ஓட்டங்களுக்கு ஆட்டமிழந்து ஏமாற்றினார். ஹாரிஸ் ஓவரில் ஹாட்ரிக் பவுண்டரி அடித்த டிராவிட், பிரவீண் குமார் ஓவரில் இரண்டு பவுண்டரி விளாசினார். இவருடன் இணைந்த வாட்சனும் அதிரடியில் மிரட்டினார். அவானாவின் ஓவரில் ஒரு சிக்சர், இரண்டு பவுண்டரி அடித்தார்.

பியுஸ் சாவ்லா பந்தில் சிக்சர் அடித்த வாட்சன்(36 ஓட்டங்கள், 17 பந்து) அவரிடமே வீழ்ந்தார். மறுமுனையில் தொடர்ந்து அசத்திய டிராவிட், அசார் மகமூது, பியுஸ் சாவ்லா பந்துகளை பவுண்டரிக்கு விரட்டினார்.

மனேரியா தன் பங்கிற்கு பியுஸ் சாவ்லா ஓவரில் அடுத்தடுத்து இரண்டு சிக்சர் விளாசினார். இந்நிலையில் டிராவிட்(46) அரைசத வாய்ப்பை இழந்தார், மனேரியா(34) நீடிக்கவில்லை.

கடைசி நேரத்தில் இரண்டு சிக்சர் அடித்த ஹாட்ஜ் 36 ஓட்டங்கள் எடுத்தார். முடிவில் ராஜஸ்தான் றொயல்ஸ் அணி 20 ஓவரில் 6 விக்கெட்டுக்கு 177 ஓட்டங்கள் எடுத்தது.

கடின இலக்கை விரட்டிய கிங்ஸ் லெவன் பஞ்சாப் அணிக்கு தொடக்கம் சரியாக அமையவில்லை. அங்கீத் சவான் பந்தில் சிக்சர் அடித்த மன்தீப் சிங்(7), வாட்சனிடம் வீழ்ந்தார். சைனி(2), டெய்ட் வேகத்தில், அவரிடமே பிடிபட்டார். ஒருமுனையில் விக்கெட் சரிந்த போதும் ஷான் மார்ஷ், மனம் தளராமல் போராடினார்.

வாட்சன் ஓவரில் 2 பவுண்டரி அடித்த இவர், அங்கீத் சவான் ஓவரில் ஒரு சிக்சர், 3 பவுண்டரி என 18 ஓட்டங்கள் எடுத்தார். அணித்தலைவர் டேவிட் ஹசி(8) வந்த வேகத்தில் பெவிலியன் கிளம்பினார். இந்நிலையில் ஷான் மார்ஷ்(34), போத்தா சுழலில் போல்டாக, பஞ்சாப் அணிக்கு சிக்கல் தொடங்கியது.

அசார் மகமூது 24 ஓட்டங்களில் வெளியேறினார். போத்தா ஓவரில் அடுத்தடுத்து பவுண்டரி அடித்த குர்கீரட் சிங்(23), அடுத்த பந்தில் கேட்ச் கொடுத்தார்.

பியுஸ் சாவ்லா(5), ஹாரிஸ்(3) நீடிக்கவில்லை. கிங்ஸ் லெவன் பஞ்சாப் அணி 20 ஓவரில் 8 விக்கெட்டுக்கு 134 ஓட்டங்கள் மட்டும் எடுத்து, 43 ஓட்டங்கள் வித்தியாசத்தில் தோல்வியடைந்தது.

ராஜஸ்தான் சார்பில் வாட்சன், டெய்ட், போத்தா தலா 2 விக்கெட் வீழ்த்தினர். ஆட்ட நாயகன் விருதை வாட்சன் தட்டிச் சென்றார்.