மும்பையை வீழ்த்துமா சென்னை சூப்பர் கிங்ஸ்???

சென்னை சூப்பர் கிங்ஸ் அணி தனது 12வது லீக் ஆட்டத்தில் மும்பை இண்டியன்ஸ் அணியுடன் இன்று மோதுகிறது.

வாங்கடே மைதானத்தில் நடக்கும் இப்போட்டி, இந்திய நேரப்படி மாலை 4.00 மணிக்கு தொடங்குகிறது.

டோனி தலைமையிலான நடப்பு சாம்பியன் சென்னை அணி இதுவரை 11 லீக் ஆட்டங்களில் விளையாடி 11 புள்ளிகள்(5 வெற்றி, 5 தோல்வி, 1 ரத்து) பெற்றுள்ளது.

புள்ளி பட்டியலில் முன்னிலை வகிக்கும் டெல்லி, கொல்கத்தா அணிகளுக்கு அரை இறுதி வாய்ப்பு பிரகாசமாக உள்ள நிலையில், 3வது மற்றும் 4வது இடத்துக்கு கடும் போட்டி நிலவுகிறது.

சென்னை அணிக்கு எஞ்சியுள்ள 5 லீக் ஆட்டங்களுமே மிகவும் சவாலானவை. அடுத்தடுத்து வலுவான அணிகளுடன் மோத உள்ளதால், அணி வீரர்கள் எல்லா வகையிலும் சிறப்பாக செயல்பட்டால் மட்டுமே அரை இறுதிக்கு முன்னேற முடியும்.

துடுப்பாட்டத்தில் டுபிளெஸ்சிஸ், ரெய்னா நல்ல பார்மில் உள்ளனர். அணித்தலைவர் டோனி கணிசமாக ஓட்டங்கள் எடுத்தாலும், அவரது அதிரடி ஆட்டம் தொலைந்து வெகு நாளாகிவிட்டது. பிராவோ, அல்பி மார்க்கெல் முன் வரிசையில் வந்தால் ஸ்கோர் வேகத்தை அதிகரிக்கலாம். விஜய்க்கு பதில் மைக்கேல் ஹஸி சேர்க்கப்படுவதும் கட்டாயம்.

மும்பை இண்டியன்ஸ் 10 போட்டியில் 12 புள்ளிகள் பெற்றுள்ளது. புனே அணியுடனான லீக் ஆட்டத்தில் துடுப்பாட்டத்தில் சொதப்பினாலும், பந்துவீச்சு மற்றும் களத்தடுப்பில் துடிப்பாக செயல்பட்டு ஒரு ஓட்டங்கள் வித்தியாசத்தில் வென்றதால் மும்பை அணி உற்சாகமாகவே உள்ளது.

உள்ளூரில் விளையாடுவதும் அந்த அணிக்கு சாதகமாக இருக்கும். சச்சின், பிராங்க்ளின், ரோகித், ராபின், ராயுடு ஆகியோரை கட்டுப்படுத்தாவிட்டால் சென்னை வீரர்களுக்கு சிக்கல்தான்.

மலிங்கா, முனாப் வேகமும், ஹர்பஜன் அனுபவ சுழலும் மும்பைக்கு கை கொடுக்கலாம். இரு அணிகளுமே வெற்றிக்காக வரிந்துகட்டுவதால் ஆட்டத்தில் அனல் பறக்கும் என்பதில் சந்தேகமில்லை.