கிளிநொச்சி முன்பள்ளி ஆசிரியர்களுக்கு கனடா வாழவைப்போம் அமைப்பு நிதியுதவி...

கிளிநொச்சி மாவட்ட முன்பள்ளி ஆசிரியர்களுக்கு கனடா வாழவைப்போம் அமைப்பு இரண்டு இலட்சத்து பத்தாயிரம் ரூபா உதவித் தொகை வழங்கியுள்ளது. தாயகத்தின் முன்பள்ளி சிறார்களின் கல்வி வளர்ச்சியில், முன்பள்ளி ஆசிரியர்கள் அர்ப்பணிப்புடன், போருக்கு முன்பும் பின்பும் பணியாற்றி வருகின்றார்கள். 2009க்கு முற்பட்ட காலப்பகுதியில் மாவட்டங்கள் தோறும் வினைத்திறன் மிக்க முன்பள்ளி நிர்வாக கட்டமைப்புக்கள் மூலம் இயங்கி வந்தன.

இதன்மூலம் முள்பள்ளி ஆசிரியர்களுக்கு ஒரு சீரான கொடுப்பனவு ஒழுங்குகள் காணப்பட்டன. போதிய பயிற்சி பட்டறைகளும் நடத்தப்பட்டதன் மூலம் முள்பள்ளி கல்வி சூழல் ஒரு மகிழ்ச்சிகரமான நிலையில் இருந்தது.

போருக்கு பின் முன்பள்ளி ஆசிரியர்கள் போரினால் பாதிக்கப்பட்ட நிலையிலும், அவர்கள் இம்மண்ணின் சிறார்களுக்காக பணியாற்ற முன்வந்தனர். அரசாங்க கல்வி நிர்வாக கட்டமைப்புக்குள் உள்வாங்கப்பட்டபோதும், முன்பள்ளி ஆசிரியர்கள் அரசாங்கத்தோடு சேர்ந்து இயங்கும் கட்சிகளின் அரசியல் இலாபங்களுக்காக அலைக்கழிக்கப்படுவதுமாக முன்பள்ளிகளின் மகிழ்ச்சிகரமான சூழல் சீர்குலைக்கப்பட்டுள்ளன.

கிளிநொச்சி மாவட்டத்தில் இத்தகைய சூழல் அதிகம் அவதானிக்கப்பட்டுள்ளது. இன்றைய வாழ்க்கைச் செலவை ஒப்பிடுமிடத்து, முன்பள்ளி ஆசிரியர்கள் எதுவித வேதனங்களும் இன்றி ஆற்றுகின்றபணி கடவுளுக்கு நிகரானது.

ஆயினும் போருக்குபின் இன்று அவர்கள் அற்பதொகைகளுக்காக அரச அரசியல் கட்சிகளால் அலைக்கழிக்கப்படுவது புறந்தள்ளப்படுவது என்று பல்வேறு நெருக்கடிகளுக்கு முகங்கொடுத்துள்ளனர்.

அவர்களின் ஆழ்மன மொழி உணர்வு, இன உணர்வு என்பனகூட வெளிக்காட்ட முடியாதவர்களாக அடக்கப்பட்டுள்ளனர். இந்த முன்பள்ளி ஆசிரியர்களுக்கு புலம்பெயர் தமிழ் சமுகம் உதவுதொகைகளை வழங்கத் தயாராக இருந்தபோதும், மாவட்ட முன்பள்ளி நிர்வாகம், அரச கட்சிகளின் ஆதரவுப் பொம்மைகளாக ஆட நிர்ப்பந்திக்கப்பட்ட நிலை இருப்பதால் பல வெளி உதவிகள் முன்பள்ளி ஆரிசியர்களின் கைகளுக்கு வராமல் திரும்பிவிட்டன என்பதுதான் உண்மை.

போருக்கு பின்னரான வாழ்வாதார நடவடிக்ககைகளில் இராணுவ மற்றும் அரச அரசியல் கட்சிகளின் தலையீடு, தொண்டு நிறுவனங்கள் மட்டுப்படுத்தப்பட்டு உள்ளமை போன்றவற்றால் இப்படியான முன்னேற்றப்பட வேண்டிய கட்டமைப்புகள் பின்தங்கிய நிலையில் உள்ளன.

இருந்தபோதும் கிளிநொச்சி மாவட்டத்தில் இருநூறுவரையான முன்பள்ளிகளும் நானூறு வரையான ஆசிரியர்களும் முன்பள்ளி கட்டமைப்புக்குள் உள்ளபோதும் இன்றுவரை அவர்களுக்கு அவர்களின் வாழ்க்கையை கொண்டு நடத்தக்கூடிய வேதனங்கள் வழங்கப்படவில்லை.

சுமார் குறிப்பிட்ட அளவு ஆசிரியர்களுக்கு மட்டும் வரையறுக்கப்பட்ட காலத்திற்கு ஒரு சிறிய கொடுப்பனவை வடமாகாண நிர்வாகம் கொடுத்துள்ளபோதும், ஏராளம் ஆசிரியர்களின் வாழ்க்கை பரிதாபத்திற்கு உரியதாகவே காணப்படுகின்றது.

முன்பள்ளி ஆசிரியர்களின் எதிர்காலத்திற்கு நம்பிக்கை ஊட்டும்படியான வாக்குறுதிகளோ திட்டங்களோ இதுவரை அரசிடம் இருந்து வழங்கப்படவில்லை.எனவே இந்த ஆசிரியர்களின் வாழ்வில் இக்கட்டான இக்காலகட்டத்தில் புலம்பெயர் சமுகம் கிளிநொச்சி மாவட்டத்தின் எல்லா முன்பள்ளி ஆசிரியர்களுக்கும் ஒரு சீரான தொடர் கொடுப்பனவு கிடைக்க முன்வரவேண்டுமென்பது தாயகத்தில் ஆவலாக இருக்கின்றது.

இப்படியாக கிளிநொச்சி மாவட்ட முன்பள்ளி ஆசிரியர்களின் நிலை காணப்படும் சூழலில், கனடா வாழவைப்போம் அமைப்பு முதற்கட்டமாக எழுபது முள்பள்ளி ஆசிரியர்களுக்கு பா.உறுப்பின்ர சி.சிறீதரன் ஊடாக, தலா 3000ரூபா வீதம் வழங்க முன்வந்திருந்தது.

இந்த உதவு தொகையை வழங்கும் நிகழ்வு, கிளிநொச்சி மாவட்ட த.தே.கூட்மைப்பு செயலகத்தில், மாவட்ட அமைப்பாளர் வேழமாலிகிதன் தலைமையில் நடைபெற்றது.

இந்நிகழ்வில் பா.உறுப்பின்ர் சிறீதரன், கரைச்சி பிரதேசசபை உறுப்பினர் பொன்னம்பலநாதன், கட்சி உறுப்பினர் சிவபாலன், முன்பள்ளி நிர்வாக இணைப்பாளர்கள், முன்பள்ளி ஆசிரயர்கள் ஆகியோர் கலந்துகொண்டனர்.

இங்கு உதவிகளை வழங்கிவைத்து கருத்துரைத்த பா.உறுப்பினர் சி. சிறீதரன்,

இந்த கொடுப்பனவு வழங்கல் என்பது அரசியல் நோக்கத்திற்கு அப்பாற்பட்ட விடயம் என்பதை நீங்கள் புரிந்துகொள்ள வேண்டும். புலம்வாழ் உறவுளின் அமைப்பான கனடா வாழவைப்போம் அமைப்பு இந்த பணத்தை முன்பள்ளி ஆசிரியர்களிடம் சேர்ப்பிப்பதற்கு நாம் ஒரு பாலமாக செயற்பட்டுள்ளோம்.

இந்த மண்ணின் குழந்தைகளின் வாழ்வின் ஆரம்ப அத்திபாரத்திற்காக தங்கள் வாழ்நாளை எதுவித எதிர்பார்ப்பும் இன்றி செலவிடும் முன்பள்ளி ஆசிரயர்களுக்கு இந்தசிறிய கொடுப்பனவு சேர்வதையிட்டு எமக்கு மகிழ்ச்சி.

இது ஒரு குறிப்பிட்ட ஆசிரியர்களுக்கே கிடைக்கின்றது. இது அனைத்து ஆசிரியர்களுக்கும் கிடைப்பதற்காக நாங்களும் முயற்சித்து வருகின்றோம். இன்றைய சூழலில் முன்பள்ளி ஆசிரியர்களுக்கு ஆங்காங்கு வழங்கப்படும் கொடுப்பனவுகள் அவர்கள் சவர்க்காரம் வாங்குவதற்கும் ஒருசில ஆடைகள் வாங்குவதற்கு மட்டுமே போதுமானது.

அவர்கள் உண்பதற்கு மருத்துவ செலவிற்கு, போக்குவரத்து செலவிற்கு என்று வாழ்வின் ஏனைய தேவைகளுக்கு என்ன செய்யமுடியும் என்பதை நினைக்கின்றபோது. அவர்களின் தியாகமனப்பாங்கு உயர்ந்து நிற்கின்றது.

இன்று பல முன்பள்ளி ஆசிரியர்கள் சொல்லமுடியாத அளவு துன்பத்திற்குள் வாழ்கிறார்கள். ஆனாலும் இந்த மண்ணின் சிறார்களுக்காக புன்னகைத்தபடி பணி செய்கிறார்கள். முன்பள்ளி ஆசிரியர்களின் வாழ்வில் உண்மையான புன்னகை ஒளி வீச எல்லோரும் முன்வரவேண்டும் என்றார்.