மேற்கிந்திய தீவுகள் அணிக்கு எதிரான மூன்று போட்டிகளிலும் இலங்கை தோல்வி...

மேற்கிந்திய தீவுகள் அணிக்கு எதிரான போட்டியில், இலங்கை பெண்கள் கிரிக்கெட் அணி மூன்று 20- 20 போட்டியிலும் தோல்வி அடைந்துள்ளது.

குயீன்ஸ் பார்க் ஓவல் மைதானத்தில் இடம்பெற்ற மூன்றாவது 20- 20 போட்டியில் நாணயச் சுழற்சியில் வெற்றி பெற்ற இலங்கைப் பெண்கள் அணி முதலில் துடுப்பெடுத்தாடத் தீர்மானித்தது.

மழை காரணமாக தாமதமாக ஆரம்பிக்கப்பட்ட இப்போட்டி 16 ஓவர்கள் கொண்ட போட்டியாக இடம்பெற்றது.

இதன்படி முதலில் துடுப்பெடுத்தாடிய இலங்கைப் பெண்கள் அணி 16 ஓவர்கள் நிறைவில் 8 விக்கெட்டுக்களை இழந்து 77 ஓட்டங்களைப் பெற்றது.

துடுப்பாட்டத்தில் இலங்கைப் பெண்கள் அணி சார்பாக தீபிக்கா ரசசிங்க 25 பந்துகளில் ஆட்டமிழக்காமல் 22 ஓட்டங்களையும், பிரசாதனி வீரக்கொடி 15 ஓட்டங்களையும் பெற்றனர்.

பந்துவீச்சில் மேற்கிந்தியத்தீவுகள் அணி சார்பாக ஷனெல் டேலி, சுப்ரினா முன்ரோ மற்றும் ஸ்டஃபானி டெய்லர் ஆகியோர் தலா 2 விக்கெட்டுக்களையும், அனிஸா மொஹமட் மற்றும் ஷெமெய்ன் கம்ப்பெல்லி ஆகியோர் தலா ஒரு விக்கெட்டையும் கைப்பற்றினர்.

16 ஓவர்களில் 78 ஓட்டங்களைப் பெற்றால் வெற்றி என்ற நிலையில், துடுப்பெடுத்தாடிய மேற்கிந்தியத் தீவுகள் அணி ஆரம்பத்திலிருந்து விக்கெட்டுக்களை இழந்த போதிலும், அதன் பின்னர் மீண்டும் வெற்றி இலக்கை 15.1 ஓவர்களில் 7 விக்கெட்டுக்களை இழந்து அடைந்தது.

ஒரு கட்டத்தில் 38 ஓட்டங்களுக்கு 6 விக்கெட்டுக்களை இழந்திருந்த போதிலும், பின்னரே வெற்றி இலக்கை அடைந்தது. துடுப்பாட்டத்தில் மேற்கிந்தியத் தீவுகள் அணி சார்பாக ஷெமெய்ன் கம்ப்பெல்லி 23 பந்துகளில் ஆட்டமிழக்காமல் 27 ஓட்டங்களையும், ட்ரெமெய்ன் ஸ்மார்ட் 8 பந்துகளில் ஆட்டமிழக்காமல் 12 ஓட்டங்களையும் பெற்றனர்.

பந்துவீச்சில் இலங்கைப் பெண்கள் அணி சார்பாக ஸ்ரீபாலி வீரக்கொடி 4 ஓவர்களில் 23 ஓட்டங்களுக்கு 3 விக்கெட்டுக்களையும், சமானி செனவிரத்ன 3 ஓவர்களில் 8 ஓட்டங்களுக்கு 2 விக்கெட்டுக்களையும், ஷஷிகலா சிரிவர்தன மற்றும் சன்டிம குணரத்ன ஆகியோர் தலா ஒரு விக்கெட்டையும் கைப்பற்றினர்.

போட்டியின் நாயகனாக ஷெமெய்ன் கம்ப்பெல்லி தெரிவு செய்யப்பட்டார்.