ஆப்கானில் வெடிகுண்டு தாக்குதலில் 6 பிரித்தானிய வீரர்கள் பலி: கமரூன் கடும் கண்டனம்

ஆப்கானிஸ்தானில் தீவிரவாதிகள் நிகழ்த்திய வெடி குண்டு தாக்குதலில் 6 பிரித்தானிய வீரர்கள் உயிரிழந்தனர். இதற்கு பிரித்தானியா கடும் கண்டனம்

தெரிவித்துள்ளது.

ஆப்கானின் ஹெல்மந்த் மாகாணத்தில் பிரிட்டிஷ் வீரர்கள் இராணுவ வாகனத்தில் ரோந்துப் பணியில் ஈடுபட்டிருந்தனர். அப்போது தீவிரவாதிகள் இராணுவ வாகனத்தின் மீது நடத்திய வெடிகுண்டுத் தாக்குதலில் 6 வீரர்கள் உயிரிழந்தனர்.

இத்தாக்குதலுக்கு பிரித்தானியா கடும் கண்டனம் தெரிவித்துள்ளது. மேலும் பிரித்தானிய பிரதமர் டேவிட் கமரூன் கூறுகையில், இது எங்களுக்கு மோசமான நாள் என தெரிவித்துள்ளார்.

அமெரிக்கத் தலைமையிலான நேட்டோ படையினர் கடந்த 10 ஆண்டுகளுக்கும் மேலாக ஆப்கானிஸ்தானில் தங்கி தீவிரவாதிகளுக்கு எதிராகப் போரிட்டு வருகின்றனர். இந்நிலையில் 2014ம் ஆண்டுக்குள் அனைத்து வீரர்களும் திரும்ப அழைக்கப்படுவர் என அமெரிக்கா தெரிவித்தது.

2014ம் ஆண்டுக்குப் பிறகும் அமெரிக்கப் படைவீரர்கள் ஆப்கனில் தங்கி வீரர்களுக்குப் பயிற்சி அளிக்க வேண்டும் என்று ஆப்கன் ஜனாதிபதி ஹமீத் கர்சாய் கேட்டுக் கொண்டுள்ளார்.

இதனையடுத்து அமெரிக்க வீரர்கள் இங்கு தங்க முடிவு செய்ததை எதிர்த்தே வெடிகுண்டு தாக்குதல்கள் அதிகரித்திருப்பதாக கருதப்படுகிறது.