வடக்கின் வசந்தம் இருளுக்குள் - யாழில் அதிரடி மின்சார வெட்டு - அரசியல் பின்புலமா? மாணவர்கள், பொதுமக்கள் விசனம்....

யாழ்ப்பாண மாவட்டத்தில் பெருமளவிலான பகுதிகளில் கூடுதலான நேரங்களுக்கு மின்சார வெட்டு ஏற்படுகின்றதாகவும் அதனால் பாரிய அசெளகரியங்களை எதிர்நோக்குவதாகவும் மக்கள் விசனம் தெரிவித்துள்ளனர்.

தொடர்ச்சியான மின்வெட்டினால் மாணவர்களே அதிகமாக பாதிக்கப்படுவதாக குறிப்பிட்டுள்ளனர்.

எந்த நேரத்தில் மின்வெட்டு ஏற்பட்டு, மீண்டும் மின் வரும் என உள்ளூர் பத்திரிகைகளில் அறிவித்தல் விடப்பட்டாலும், அந்நேரத்தை விட முன்னரே மின்வெட்டு ஏற்பட்டு, மீண்டும் மின் வருவதில்லை எனவும் மக்கள் தெரிவித்துள்ளனர்.

க.பொ.த. உயர்தர பரீட்சைக்கு மாணவர்கள் தங்களை தயார்ப்படுத்தி வரும் இக்காலப் பகுதியில் இவ்வாறு அடிக்கடி தொடர் மின்வெட்டு ஏற்படுவதனால், தம்மால் படிக்க முடியவில்லை என விசனப்படுகின்றனர் மாணவர்கள்.

பகல் வேளை மட்டுமன்றி இரவு நேரங்களிலும் கூடுதலாக இம் மின்வெட்டு இடம்பெறுவதாக மின்சார சபை மீது குற்றம் சுமத்துகின்றனர்.

இரவு நேரத்தில் வேலை செய்யும் வேலைத்தளங்களில் சரியான முறையில் வேலைகள் நடைபெற முடியவில்லை எனவும், மாணவர்களுக்கு பாடசாலையில் கொடுக்கப்படும் வீட்டுப் பாடத்திட்டங்களை முடிக்காமல் மறுநாள் பாடசாலை சென்று ஆசிரியர்களிடம் தண்டனைகளைப் பெற்றுக்கொள்கின்றனர் எனவும் தெரியவந்துள்ளது.

இவ்வாறு இரவு நேர மின்வெட்டினால் நாட்டின் பெரும்பாலான பகுதிகளில் கொலை, கொள்ளைகள் அதிகரித்து வருவதாகவும் அறியப்படுகின்றது.

அண்மைக்காலமாக இந்து மதத் தலங்களுள் பிராமணர் தவிர வேறு யாராலும் உட்புக முடியாத மூலஸ்தானப் பகுதிக்குள் சென்று ஆலய விக்கிரங்கள் பல களவாடப்பட்டதும் இவ்வாறான மின்வெட்டு அமுலில் இருந்த வேளைகளில் தான் என மக்கள் தெரிவிக்கின்றனர்.

கடந்த வருடம் டிசம்பர் மாதம் அதாவது க.பொ.த.சாதாரண தர பரீட்சைக்காக மாணவர்கள் தம்மை தயார்ப்படுத்தி வந்த நிலையில் தான் அக்காலப்பகுதியிலும் அடிக்கடி தொடர் மின்வெட்டுக்கள் மிக மோசமாக அமுல்படுத்தியதாகவும், இவ்வருடம் ஆகஸ்ட் மாதம் நடைபெறவிருக்கும் க.பொ.த. உயர்தர பரீட்சை காலப்பகுதியிலும் அவ்வாறான தொடர் மின்வெட்டினை அமுல்படுத்தி வருவதாகவும் மாணவர் சமுதாயம் கவலை தெரிவித்துள்ளனர்.

இவ்வாறாக அடிக்கடி முன்னறிவித்தலுக்கு எதிர்மாறாக மின்வெட்டினை செயற்படுத்தி வரும் மின்சார சபைக்குள் அரசியல் பலம் உட்புகுத்தப்பட்டுள்ளதா என தெரியமுடியவில்லை என  மேலும் தெரிவித்துள்ளனர்.

யாழ். மாணவர்கள் படிப்பினை இழக்க வேண்டும் என்பதற்காகவும், நாட்டில் கொலை, கொள்ளை, கலாச்சார சீரழிவுகள் இடம்பெறவேண்டும் என்பதற்காகவுமா இவ்வாறு மின்வெட்டுக்களை இரவு நேரங்களில் அதிகளவாக அமுல்படுத்துகின்றனர் எனவும், யாழ் அமைச்சர்கள் இதுபற்றி அக்கறை மேற்கொள்வதாக தெரியவில்லை எனவும் மக்கள் விமர்சிக்கின்றனர்.

எப்போது மீண்டும் மின் இணைப்பு வரும் என கேட்பதற்காக எந்த நேரத்திலும் மின்சார சபையை தொலைபேசியூடாக தொடர்பு கொள்ளுங்கள் என அறிக்கை விடப்பட்டாலும்,  அத் தொடர்பாடல் இணைப்பு துண்டிக்கப்பட்ட நிலையிலேயே இருப்பதாகவும் சில அரச ஊழியர்கள் தெரிவிக்கின்றனர்.

ஆனாலும் சிற்சில பகுதிகளுக்கு மின்சாரத்தினை தவறாமல் ஒழுங்காக வழங்கி வருவதாகவும் தெரியவந்துள்ளது.

இத் தொடர்ச்சியான மின்வெட்டு தான் வடக்கின் வசந்தமா என மக்கள் அரசை திட்டியபடி தம் அன்றாட வேலைகளை தொடர்கின்றனர்.