தவறாக நடந்து கொண்டதற்காக விவியன் ரிச்சர்ட்ஸிடம் மன்னிப்பு கேட்டார் ராம்தின்...

மேற்கிந்திய தீவுகளின் விக்கெட் கீப்பர் ராம்தின் ஆட்டம் சரியில்லை என்று முன்னாள் வீரர் விவியன் ரிச்சர்ட்ஸ் விமர்சனம் செய்தார்.

இந்நிலையில் 3வது டெஸ்டில் சதம் விளாசிய ராம்தின், கையுடன் எழுதி கொண்டு வந்த பேப்பரில் ரிச்சர்ட்சுக்கு பதிலடி கொடுத்தார். பரபரப்பை ஏற்படுத்திய இந்த சம்பவத்துக்கு தற்போது அவர் ரிச்சர்ட்சிடம் மன்னிப்பு கேட்டுள்ளார்.

இதுகுறித்து ராம்தின் கூறுகையில், நான் ரிச்சர்ட்ஸ் விமர்சனத்தால் உணர்ச்சிவசப்பட்டிருந்தேன். அதனால் இவ்வாறு செய்து விட்டேன். ரிச்சர்ட்ஸ் மேற்கிந்திய தீவுகளின் மிகப்பெரிய ஹீரோ. நான் அவர் மீது தற்போதும் மரியாதை வைத்துள்ளேன். விரைவில் அவரை சந்தித்து மன்னிப்பு கேட்பேன் என்றார்.

இது குறித்து ரிச்சர்ட்ஸ் கூறுகையில், ராம்தினின் இந்த செயல் தேவையற்றது. இருப்பினும் அவர் உணர்ச்சிவசப்பட்ட நிலையில் இவ்வாறு செய்து விட்டார்.

மேற்கிந்திய தீவுகளின் எதிர்கால அணித்தலைவர் என்று அவரை நான் குறிப்பிட்டிருக்கிறேன். தற்போது அவரது ஆட்டம் சரியில்லை. எனவே விமர்சனம் செய்தேன். டெஸ்ட் தொடரை இழந்த சூழ்நிலையில் கடைசி போட்டியில் சதம் அடித்ததால் எந்த பயனும் இல்லை எனவும் தெரிவித்தார்.

இங்கிலாந்து, மேற்கிந்திய தீவுகள் அணிகள் மோதிய 3 போட்டிகள் கொண்ட டெஸ்ட் தொடரில் இங்கிலாந்து 2-0 என்ற கணக்கில் தொடரை கைப்பற்றியது. மூன்றாவது டெஸ்ட் போட்டி மழையினால் சமன் ஆனது குறிப்பிடத்தக்கது.