மட்டக்களப்பில் சட்டவிரோதமாக வெட்டப்பட்ட தேக்கு மரக்குற்றிகளுடன் ஐவர் கைது...

மட்டக்களப்பு மாவட்டத்தின் ஏறாவூர் பொலிஸ் பிரிவுக்குட்பட்ட சந்தனமடு ஆற்று காட்டு பிரதேசத்தில் சட்டவிரோதமாக வெட்டப்பட்டு அனுமதிப் பத்திரமின்றி எடுத்துச்செல்லப்பட்ட பெருந்தொகை தேக்கு மரக்குற்றிகள் மற்றும் தடைசெய்யப்பட்ட இடத்தில் அகழப்பட்ட மண் என்பனவற்றை பொலிஸார் மீட்டுள்ளனர்.

கிடைக்கப்பெற்ற இரகசிய தகவலையடுத்து, இவற்றை கைப்பற்றியதாக ஏறாவூர் பொலிஸ் நிலைய பொறுப்பதிகாரி காஞ்சன கொடகும்புற தெரிவித்தார்.

இதன்போது ஐந்து பேர் கைதுசெய்யப்பட்டுள்ளதுடன் இரண்டு டக்ரக்டர்கள், மூன்று மாட்டு வண்டிகளையும் கைப்பற்றியுள்ளதாகவும் அவர் தெரிவித்தார்.

கைப்பற்றப்பட்ட மரம் மற்றும் மண்ணையும் கைதுசெய்யப்பட்டவர்களையும் நீதிமன்றில் ஆஜர்படுத்தும் நடவடிக்கைகள் மேற்கொள்ளப்பட்டு வருவதாகவும் அவர் தெரிவித்தார்.

இது தொடர்பிலான மேலதிக விசாரணைகளை ஏறாவூர் பொலிஸார் மேற்கொண்டு வருகின்றனர்.