அவுஸ்திரேலியாவை பரபரப்புக்கு உள்ளாக்கியுள்ள படகு விபத்து...

அவுஸ்திரேலியாவினைப் பெரும் பரப்புக்கு உள்ளாக்கியுள்ள படகு விபத்தில் 109 பேர் தற்போது உயிருடன் காப்பாற்றப்பட்டுள்ளதாகவும், 80 பேர் வரை காணாமல் போயுள்ளதாகவும் அவுஸ்திரேலிய உள்விவகார அமைச்சர் ஜேசன் க்ளயார் குறிப்பிட்டுள்ளார்.

விபத்துக்குள்ளான படகில் இலங்கையர்கள் இருக்கக்கூடும் என எதிர்பார்க்கப்பட்ட போதும் அநேகமானோர் ஆப்கானிஸ்தானைச் சேர்ந்தவர்கள் எனவும் அவர் தெரிவித்துள்ளார்.

காப்பாற்றப்பட்டவர்களில் 4 பேர் பின்னர் உயிரிழந்துள்ளதாக தெரிவிக்கப்படுகின்றது.

இதேவேளை காப்பாற்றப்பட்டவர்களில் இலங்கையர்கள் எவரும் இல்லை என இந்தோனேசியாவிற்கான இலங்கைத் தூதுவர் மேஜர் ஜெனரல் நந்த மல்லவராச்சி தெரிவித்துள்ளார்.

இலங்கையில் இருந்து இந்தப் படகு புறப்பட்டிருக்கலாம் என ஆரம்பச் செய்திகள் தெரிவித்திருந்த போதும் விபத்துக்குள்ளான படகு இலங்கையில் இருந்த புறப்படவில்லை என
உறுதிப்படுத்தப்பட்டுள்ளதாக பிந்திய செய்திகள் தெரிவித்துள்ளன.

ஆப்கானிஸ்தான், ஈராக், ஈரான் நாட்டவர்களுடன் இந்தோனேசியாவில் இருந்தே இந்தப் படகு புறப்பட்டதாக மீட்கப்பட்டவர்கள் வழங்கிய தகவல் ஊடாக தெரியவந்துள்ளது.

இந்த மாதத்திற்குள் மாத்திரம் 1000 க்கும் மேற்பட்டவர்கள் ஆபத்து மிகுந்த இந்த கடல்வழிப் பயணம் ஊடாக அவுஸ்திரேலியாவை சென்றடைந்துள்ளனர் என தெரிவிக்கப்பட்டுகின்றது.

இதேவேளை இந்த ஆண்டில் மாத்திரம் 62 படகுகளில் 4,484 பேர் அவுஸ்திரேலியாவை சென்றடைந்துள்ளனர்.

கடந்த டிசம்பரில் ஆப்கான், ஈரான் நாட்டவர்களுடன் அவுஸ்திரேலியாவை நோக்கிச் சென்ற படகொன்று விபத்துக்குள்ளானதில் சுமார் 200 பேரளவில் காணாமல் போன நிலையில் 47 பேர் மாத்திரமே மீட்கப்பட்டிருந்தனர் என்பது இங்கு குறிப்பிடத்தக்கது