மட்டக்களப்பில் சிறுவர்களை வேலைக்கு அமர்த்துவதற்கெதிராக ஆர்ப்பாட்டம்...

மட்டக்களப்பு மாவட்டத்தில் சிறுவர்களை வேலைக்கு அமர்த்துவதற்கு எதிரான சர்வதேச தினத்தை முன்னிட்டு பல்வேறு விழிப்புணர்வு நிகழ்வுகள் இடம்பெற்றன.

“மனித உரிமை மற்றும் சமூக நீதி……. சிறுவர்களை வேலைக்கமர்த்துவதை நிறுத்துவோம்” என்ற கருப்பொருளில் இந்த விழிப்புணர்வு நடவடிக்கைகள் மேற்கொள்ளப்பட்டு வருகின்றனன.

இதன் கீழ் மட்டக்களப்பு மாவட்ட செயலகமும் தேசிய சிறுவர் பாதுகாப்பு அதிகாரசபையும் இணைந்து பல்வேறு விழிப்புணர்வு நடவடிக்கையை மேற்கொண்டது. இன்று காலை பாடசாலை மாணவர்களின் பங்களிப்புடன் விழிப்புணர்வு ஊர்வலம் ஒன்று மட்டக்களப்பு இந்துக்கல்லூரி மைதானத்தில் இருந்து ஆரம்பமானது.

சிறுவர்களை வேலைக்கு அமர்த்துதலுக்கு எதிர்ப்பு தெரிவிக்கும் பதாகைகளை தாங்கிய வண்ணம் இந்த விழிப்புணர்வு ஊர்வலத்தில் மாணவர்கள் கலந்துகொண்டனர்.

அத்துடன் சிறுவர்களை வேலைக்கு அமர்த்துவதால் ஏற்படும் பாதிப்புக்கள் வேலைக்கு அமர்த்துவோருக்கு எதிராக மேற்கொள்ளப்படும் சட்ட நடவடிக்கைகள் மற்றும் சிறுவர்களை வேலைக்கு அமர்த்துவதை தடுக்கும் வழிமுறைகள் கொண்ட துண்டுப் பிரசுரங்களும் விநியோகிக்கப்பட்டன.

இந்த ஊர்வலத்தில் தேசிய சிறுவர் பாதுகாப்பு அதிகாரசபையின் ஊழியர்கள், மாவட்ட செயலக அதிகாரிகள் கலந்து கொண்டனர்.