ஆப்கானில் வெளிநாட்டவர் மது அருந்தி கொண்டாட்டம்: விடிய விடிய தலிபான்கள் தாக்குதல்...

ஆப்கானிஸ்தானின் காபூல் வடக்கே ஏரி அருகில் பிரபல ஹோட்டல் உள்ளது. இரண்டு மாடி கொண்ட இந்த ஹோட்டலில் நேற்றிரவு திருமண நிகழ்ச்சி நடந்து கொண்டிருந்தது.

உறவினர்கள், நண்பர்கள் உற்சாகமாக ஆடி பாடிக் கொண்டிருந்தனர். அப்போது 3 தற்கொலை படை தீவிரவாதிகள் திடீரென வந்து ஹோட்டல் மீது பயங்கர தாக்குதல் நடத்தினர். இதனால் பதற்றம் ஏற்பட்டது.

ஹோட்டலுக்குள் புகுந்த தீவிரவாதிகள் அனைவரையும் பிணைக் கைதிகளாக பிடித்து வைத்துக் கொண்டனர். தகவல் அறிந்து இராணுவம் மற்றும் பொலிசார் ஹோட்டலை சுற்றி வளைத்து தாக்குதல் நடத்த தொடங்கினர்.

இருதரப்புக்கும் இடையில் விடிய விடிய துப்பாக்கிச் சண்டை நடந்தது. இதுகுறித்து இராணுவ கமாண்டர் ஜெனரல் கதாம் ஷா ஷாயம் கூறியதாவது, பொலிசார் மற்றும் பொதுமக்களை குறி வைத்து இந்த தாக்குதல் நடத்தப்பட்டது. இரவு 11.30 மணிக்கு தீவிரவாதிகள் தாக்குதல் நடத்த தொடங்கினர்.

அவர்களுக்கு இராணுவத்தினரும் பொலிசாரும் பதிலடி கொடுத்தனர். இருதரப்புக்கு இடையில் விடிய விடிய துப்பாக்கிச் சண்டை நடந்தது. இதில் 2 தீவிரவாதிகள் சுட்டுக் கொல்லப்பட்டனர்.

பெண்கள், குழந்தைகள் உள்பட 18 பேர் மீட்கப்பட்டனர். ஹோட்டலின் 2வது மாடி இராணுவத்தின் கட்டுப்பாட்டில் உள்ளது. தீவிரவாதிகள் தாக்குதலால் பீதி அடைந்த சிலர் மாடியில் இருந்து ஜன்னல் வழியாக குதித்து உயிர் தப்பினர். இந்த சண்டையில் பொலிசார் ஒருவரும் பலியானார்.

ஹோட்டலில் உள்ள ஒரு தீவிரவாதி தொடர்ந்து துப்பாக்கிச் சூடு நடத்தி வருகிறான். அவனை பிடிக்க இராணுவத்தினர் ஹோட்டலை சுற்றிலும் தயாராக உள்ளனர். உள்ளே இன்னும் பொதுமக்கள் பலர் உள்ளனர். அதனால் நிலைமையை உன்னிப்பாக கவனித்து வருகிறோம் என்று ஜெனரல் கதாம் கூறினார்.

இந்த தாக்குதலில் பொதுமக்களில் சிலரும் பலியாகி உள்ளனர். இதுகுறித்து உடனடியாக தகவல் வெளியிடப்படவில்லை.

இதுகுறித்து தலிபான் இயக்க செய்தி தொடர்பாளர் ஜபியுல்லா முஜாகித் கூறுகையில், முஸ்லிம் மதத்துக்கு எதிராக வெளிநாட்டினர் அந்த ஹோட்டலில் மது குடித்து ஆட்டம் பாட்டத்தில் ஈடுபடுகின்றனர். அதை தடுக்கவே தாக்குதல் நடத்தினோம் என்று தெரிவித்துள்ளார்.