இலங்கை ரூபாவின் மதிப்பு மேலும் வீழ்ச்சி அடைந்துள்ளது...

அமெரிக்க டொலருக்கு எதிரான இலங்கை ரூபாவின் பெறுமதி 133.60 ரூபாவாக இன்று செவ்வாய்க்கிழமை வீழ்ச்சியடைந்துள்ளது. டொலருக்கு எதிராக இலங்கை ரூபாவின் மிகக் குறைந்த பெறுமதி இதுவாகும்.

இன்று அதிக பட்சமாக 133.60 ரூபா வீதம் விற்பனை இடம்பெற்றது.

இவ்விடயத்தில் மத்திய வங்கியோ ஏனைய அரசவங்கிகளோ தலையிட்டதாக நாம் காணவில்லை. அனேகமாக, சர்வதேச நாணய நிதியத்துடனான பேச்சுவார்த்தைகள் காரணமாக அவர்களின் கைகள் கட்டப்பட்டிருக்கலாம்" என நாணய பரிமாற்றுநர் ஒருவர் தெரிவித்துள்ளார்.

133.60 வீதம் டொலர் விற்கப்பட்டதை நான்கு முகவர்கள் உறுதிப்படுத்தியுள்ளனர்.

இதற்குமுன் அதிக பட்சமாக, ஏப்ரல் 25 ஆம் திகதி டொலரின் பெறுமதி 133.00 ஆக இருந்தது.

நாணய பரிமாற்று வீதத்தில் நெகிழ்வுத்தன்மையை கடைப்பிடிக்குமாறு மத்திய வங்கிக்கு சர்வதேச நாணய நிதியம் நீண்டகாலமாக அழுத்தம் கொடுத்து வந்தது.

இந்நிலையில் 420 மில்லியன் டொலர் கடனின் கடைசித் தொகுதியை வழங்குவது தொடர்பாக சர்வதேச நாணய நிதியத்தின் பிரதிநிதிகளுக்கும் மத்திய வங்கி மற்றும் இலங்கை அரசாங்க அதிகாரிகளுக்கும் இடையில் பேச்சுவார்த்தை நடைபெறுகின்றமை குறிப்பிடத்தக்கது.