புதிய அமெரிக்க உயர்ஸ்தானிகரின் கருத்தால் இலங்கை கடும் அதிர்ச்சியில்! மகிந்த - பீரிஸ் ஆராய்வு...

மனித உரிமைகள் விவகாரம், பொறுப்புக்கூறும் கடப்பாடு உள்ளிட்ட இலங்கை விடயங்கள் தொடர்பில் இலங்கைக்கான அமெரிக்காவின் புதிய உயர்ஸ்தானிகர் மிச்சேல் சிசன் வெளியிட்டுள்ள கருத்துகள் மகிந்த ராஜபக்ச அரசுக்கு கடும் அதிர்ச்சியை ஏற்படுத்தியுள்ளதாக தெரிவிக்கப்படுகிறது.

அதில் குறிப்பாக, யுத்தம் இடம்பெற்ற பகுதிகளில் இலங்கை அரசு இராணுவ பிரசன்னத்தைக் குறைக்கவேண்டும், வடமாகாணசபை தேர்தலை நடத்துவதற்கான திகதியை அறிவிக்க வேண்டும், யுத்தக் குற்றச்சாட்டுகள் தொடர்பில் பொறுப்புக்கூறும் கடப்பாட்டை அரசு வெளிப்படுத்த வேண்டும் போன்ற விடயங்கள் முக்கியமானவை.

இவரின் கருத்துகளானது இலங்கை அரசுக்கு சவால்மிக்கதாக அமைந்துள்ளன என்றும், மேற்கூறப்பட்ட விடயங்களை அரசு கட்டாயம் செய்து முடிக்கவேண்டும் என்றும் மேற்குலக அரசியல் வல்லுனர்கள் சுட்டிக்காட்டுகின்றனர்.

இலங்கைக்கும் அமெரிக்காவுக்குமிடையிலான இராஜதந்திர மட்டத்திலான உறவில் பனிப்போர் மூண்டுள்ள இவ்வேளையில், புதிதாக நியமனம் பெற்று கொழும்பு வரவுள்ள அமெரிக்க உயர்ஸ்தானிகர், இலங்கை அரசு செய்து முடிக்க வேண்டிய நடவடிக்கைகளை முன்கூட்டியே அறிவித்துள்ளமையானது மகிந்த அரசுக்கு என்றுமில்லாத அளவுக்கு கடும் அதிர்ச்சியைக் கொடுத்துள்ளது.

இலங்கைக்கான அமெரிக்க உயர்ஸ்தானிகர் நியமனத்துக்கான உறுதியை அமெரிக்க செனட் நேற்று முன்நாள் மிச்சேல் சிசனுக்கு வழங்கியது.

நியமனத்தை பெற்ற பின்னர் விசேட உரையொன்றை நிகழ்த்தியபோதே அவர் இலங்கை விவகாரம் குறித்து முக்கிய பல விடயங்களை எடுத்துரைத்தார்.

அதேவேளை, அமெரிக்க உயர்ஸ்தானிகர் வெளியிட்டுள்ள கருத்துகள் தொடர்பில் வெளிநாடு சென்றுள்ள ஜனாதிபதி மகிந்த ராஜபக்சவுக்கு வெளிவிவகார அமைச்சர் ஜீ.எல்.பீரிஸ் தெளிவுபடுத்தியுள்ளார்.

இதனையடுத்து, அமெரிக்க உயர்ஸ்தானிகர் நாட்டுக்கு வந்ததும் அவரை அழைத்து நிலைமைகளைத் தெளிவுபடுத்துமாறு வெளிவிவகார அமைச்சருக்கு ஜனாதிபதி பணிப்புரை விடுத்துள்ளார்.

இதற்கான பூர்வாங்க நடவடிக்கைகளை வெளிவிவகார அமைச்சு மேற்கொண்டு வருவதாகவும் தெரியவந்திருக்கின்றது.