புலிச் சந்தேகநபர்கள் சிறைச்சாலைகளை வீடியோ காட்சிகளாக எடுத்துள்ளனர்...

அனுராதபுரம் மற்றும் கொழும்பு சிறைச்சாலையில் தடுத்து வைக்கப்பட்டுள்ள தமிழீழ விடுதலைப் புலிச் சந்தேக நபர்கள் சிறைச்சாலைகளை வீடியோ எடுத்துள்ளதாகத் தெரிவிக்கப்படுகிறது.

அனுராதபுரம் மற்றும் கொழும்பு சிறைச்சாலையில் தடுத்து வைக்கப்பட்டுள்ள விடுதலைப் புலிச் சந்தேக நபர்களிடமிருந்து சுமார் 44 செல்லிடப் பேசிகள் மீட்கப்பட்டுள்ளன.

இவற்றில் சில செய்மதித் தொழில்நுட்பம் மற்றும் வீடியோ பதிவு செய்யக் கூடிய வசதிகளைக் கொண்டவை. புலிச் சந்தேக நபர்கள் சிறைச்சாலையை வீடியோ பதிவு செய்து வெளிநாட்டுக்கு அனுப்பி வைக்க முயற்சித்துள்ளனர்.

சிறைச்சாலை அதிகாரிகள் நடத்திய திடீர் சோதனையின் போது இந்த செல்லிடப்பேசிகள் மீட்கப்பட்டுள்ளன.

கைதிகள் நடத்தும் உண்ணா நிலைப் போராட்டம் உள்ளிட்ட பல்வேறு செயற்பாடுகள் இவ்வாறு வீடியோ காட்சி எடுக்கப்பட்டுள்ளதாகத் தெரிவிக்கப்படுகிறது.

புலிச் சந்தேக நபர்களுக்கு சிறைச்சாலை அதிகாரிகளின் ஒத்துழைப்பு கிடைக்கப் பெற்றுள்ளது. சிறைச்சாலை அதிகாரிகள் புலிச் சந்தேக நபர்களினால் எடுக்கப்பட்ட வீடியோ காட்சிகள் அடங்கிய சிம் அட்டைகளை சில நபர்களுக்கு விநியோகம் செய்துள்ளனர்.