லண்டனில் மஹிந்த தங்கியிருக்கும் விடுதியை முற்றுகையிட்டுள்ள ஈழத் தமிழர்கள்...

பிரித்தானிய மகாராணியின் மகுடம் சூடி அறுபது ஆண்டுகள் நிறைவுகொண்டாட்ட நிகழ்வுகள் நடைபெற்றுவருகின்ற வேளையில் அந்த நிகழ்வில் கலந்து கொள்வதற்காக நேற்று லண்டன் வந்துள்ள ராசபக்சே தங்கியுள்ள விடுதிக்கு முன்னால் ஆர்ப்பாட்டம் நடைபெறுகின்றது.

மஹிந்த ராஜபக்‌ஷ நேற்றிரவும் 8மணிக்கு லண்டன் ஹீத்றூ விமானநிலையத்தில் வந்திறங்குவார் என்ற தகவலையடுத்து லண்டன் ஹீத்றூ விமான நிலைய வரவேற்பாளர் அரங்கம் பிரித்தானிய வாழ் ஈழத்தமிழர்களால் முற்றுகையிடப்பட்டிருந்தது.

தமிழீழத் தேசியக் கொடியான புலிக்கொடிகளை கைகளில் ஏந்திய பிரித்தானிய வாழ் ஈழத்தமிழர்கள் உணர்ச்சி பொங்க கோசங்களை எழுப்பி மஹிந்தவின் வருகைக்கு எதிர்ப்பு தெரிவித்திருந்தனர்.

அதனைத் தொடர்ந்து இன்று மஹிந்த தங்கியிருக்கும் விடுதியை கண்டறிந்து முற்றுகைக்குள் கொண்டுவந்து மிகவும் உறுதியுடன் போராடிக் கொண்டிருக்கின்றனர் பிரித்தானியவாழ் புலம்பெயர் ஈழத்தமிழர்கள்.

இல:22 பார்க் லேன் லண்டன் என்ற முகவரியில் அமைந்துள்ள ஹில்ரன் விடுதியும் அதற்கு மிக அருகாமையில் அமைந்துள்ள டொர்ச்ஸர் விடுதியும் சுற்றி ஆர்ப்பாட்டம் நடைபெற்றுக்கொண்டு இருக்கின்றது.

இரண்டு விடுதிகளின் முன் ஆர்ப்பாட்டம் நடாத்துவதற்கு காவல்துறையினரின் அனுமதியுடன், புலிக்கொடியை பேராயுதமாக கைகளில் ஏந்தி ராசபக்சேவிற்கு எதிராக கோசங்களை எழுப்பிக் கொண்டிருக்கும் இவ் ஆர்ப்பாட்டம்  நிச்சயமாக ராசபக்சேவை மிரட்சிக்குள்ளாக்கும்.

இப் பே(போ)ராட்டத்தை அறிந்த மகிந்த உள்ளிட்ட சிங்களவர்களிற்கு பேரச்சத்தை ஏற்படுத்தும் விதமாகவே எம்மவர்களது போராட்டம் வீச்சுப்பெற்றுள்ளது. நேரம் செல்லச் செல்ல ஓயாத அலைகளாக வந்திணையும் ஈழ மக்களின் கோசங்கள் விண்ணை முட்டும் வண்ணம் எதிரொளித்துக் கொண்டிருக்கின்றது.

புலம்பெயர்வாழ் தமிழர்களின் இவ் ஆர்ப்பாட்ட முற்றுகையில் சிக்கியுள்ள ராசபக்சேவின் நிலை பரிதாபகரமானதாக உள்ளது. ராசபக்சேவிற்கு எதிரான போர் ஓய்ந்துவிடப் போவதில்லை. எத்தனை தடவைகள் வந்தாலும் உறுதியோடு விரட்டியடிப்போம் என சூளுரைத்து ஆர்ப்பாட்டத்தில் கலந்துகொண்டுள்ளனர் எமது உறவுகள்.

இவ் ஆர்ப்பாட்டம் இன்றுடன் முடியப்போவதில்லை... எதிர்வரும் 6ம் திகதியும் நடைபெறவுள்ளதால் அனைத்து உறவுகளையும் உணர்வுடன் வந்து கலந்துகொள்ளுமாறு ஏற்பாட்டாளர்கள் கேட்டுக்கொள்கின்றனர்.