கைது செய்யப்படும் சந்தேகநபர்களை பொலிஸார் 48 மணித்தியாலம் தடுத்துவைக்கும் சட்டத்திருத்தம் விரைவில்...

குற்றச் செயல்களுடன் சம்பந்தப்பட்டவர்களென கைது செய்யப்படும் சந்தேக நபர்களை, நீதவான் முன்னிலையில் ஆஜர்படுத்துவதற்குமுன் 48 மணித்தியாலங்களுக்கு தடுத்துவைப்பதற்கு பொலிஸாருக்கு அதிகாரமளிக்கும் வகையில் குற்றவியல் நடைமுறைக் கோவையில் திருத்தம் செய்வதற்கு நீதியமைச்சு நடவடிக்கை மேற்கொண்டுள்ளது.

நாட்டில் அதிகரித்துவரும் குற்றச்செயல்களை கட்டுப்படுத்துவதே இத்திட்டத்தின் பிரதான நோக்கமாகும் என அமைச்சின் உயர்மட்ட வட்டாரங்கள் தெரிவித்தன.

கொலை, கொள்ளை, பாலியல் வல்லுறவு போன்ற குற்றங்களுக்கான விசேட பட்டியலொன்றையும் இத்திருத்தம் கொண்டிருக்கும் எனவும் தெரிவிக்கப்பட்டுள்ளது.

இச்சட்டத் திருத்தத்தை இலங்கை சட்டத்தரணிகள் சங்கம் வரவேற்பதாக அதன் தலைவரான நாடாளுமன்ற உறுப்பினர் விஜேதாஸ ராஜபக்ஸ தெரிவித்துள்ளார்.

மேலும், சந்தேக நபர்களினதும் சட்டத்தரணிகளினதும் உரிமைகளைப் பாதுகாக்க நடவடிக்கை எடுக்கப்படுவதுடன், பொலிஸ் நிலையங்களில் தடுத்துவைக்கப்பட்டுள்ள சந்தேக நபர்களை சட்டத்தரணிகள் நேரடியாக சந்திப்பதற்கு அனுமதி வழங்கப்படும் என சட்டத்தரணிகள் சங்கத்திற்கு பொலிஸ் மா அதிபர் உறுதியளித்துள்ளார் என நாடாளுமன்ற உறுப்பினர் விஜேதாஸ ராஜபக்ஸ குறிப்பிட்டார்.

தற்போது 24 மணித்தியாலங்கள் வரையே சந்தேக நபர்கள் பொலிஸ் நிலையங்களில் தடுத்து வைப்பதற்கு அனுமதிக்கப்படுகின்றமை குறிப்பிடத்தக்கது.