டெஸ்ட் தரவரிசையில் மீண்டும் முதலிடத்தை பிடிப்போம்: சச்சின்...

இந்திய கிரிக்கெட் அணி டெஸ்ட் போட்டிகளில் சமீப காலங்களில் மோசமான தோல்வியை தழுவியது.

இங்கிலாந்து, அவுஸ்திரேலியா நாடுகளின் சுற்றுப்பயணத்தில் இந்திய அணி தான் மோதிய அனைத்து டெஸ்டிலும் தோல்வியுற்றது. வெளிநாட்டு மைதானத்தில் தொடர்ந்து 8 டெஸ்டில் தோல்வியுற்று கடும் விமர்சனத்துக்கு உள்ளானது. இங்கிலாந்தில் ஏற்பட்ட தோல்வியால் இந்தியா தரவரிசையில் முதலிடத்தை இடத்தை இழந்தது.

இந்நிலையில் இந்திய அணி டெஸ்டில் மீண்டும் “நம்பர் 1” இடத்தை பிடிக்கும் என்று நட்சத்திர வீரர் சச்சின் டெண்டுல்கர் நம்பிக்கை தெரிவித்து உள்ளார்.

இது குறித்து அவர் கூறுகையில், இங்கிலாந்து, அவுஸ்திரேலியாவில் தொடர்ந்து தோல்வியை தழுவியது. மிகுந்த வேதனை அளிக்கிறது. அதில் இருந்து நாங்கள் மீண்டும் இனி வரும் டெஸ்ட் போட்டிகளில் சிறப்பாக விளையாடுவோம்.

நவம்பர் மாதம் இந்தியாவுக்கு வரும் இங்கிலாந்து அணிக்கெதிராக சிறப்பாக விளையாடி மீண்டும் முதல் இடத்தை பிடிப்போம். ஆனால் இது பழிவாங்கும் தொடர் என்று கூற முடியாது.

2007ம் ஆண்டு உலக கிண்ணத்துக்கு பின்பும் 2011ம் ஆண்டு உலக கிண்ணத்தை கைப்பற்றியது வரையும் 4 ஆண்டுகளில் இந்திய அணி சிறப்பாகவே விளையாடியது. ஒரே இரவில் “நம்பர் 1” இடத்தை பிடிக்கவில்லை.

உலகக் கிண்ண வெற்றி கொண்டாட்டம் காரணமாகவே இங்கிலாந்து, அவுஸ்திரேலியாவுக்கு எதிரான டெஸ்ட் தொடரில் தோல்வியுற்றோம் என்று கூறிவிட முடியாது என்றும் அதிக நம்பிக்கைதான் இதற்கு காரணம் என்று கூறுவதையும் ஏற்க இயலாது எனவும் தெரிவித்தார்.