படுகொலை செய்யப்பட்ட ஊடகவியலாளர்களான சிவாராம் மற்றும் நடேசனின் நினைவுரை...

படுகொலை செய்யப்பட்ட ஊடகவியலாளர்களான த. சிவராம், ஜ. நடேன் ஆகியோர் தொடர்பான நினைவுரை கொழும்பு தமிழ்ச் சங்க மண்டபத்தில் எதிர்வரும் 7ஆம் திகதி இடம்பெறவுள்ளது.

இலங்கைத் தமிழ் ஊடகவியலாளர் ஒன்றியத்தின் ஏற்பாட்டில் இடம்பெறும் இந்த நிகழ்வுக்கு ஒன்றியத்தின் தலைவர் ஆனந் பாலகிட்ணர் தலைமை தாங்கவுள்ளார்.

இந்நிகழ்வில், “தற்போதைய அரசியல் சூழலில் ஊடகத்துறையின் நிலை” என்ற தொனிப்பொருளில் சுயாதீன ஊடகவியலாளர் ரணத்குமாரசிங்க உரையாற்றவுள்ளார். கொழும்பு பல்கலைக்கழக அரசியல் விஞ்ஞானத்துறை வருகை விரிவுரையாளர் கே.சர்வேஸ்வரன் சிறப்புரையாற்றுவார்.

அரசியல் கட்சிகளின் பிரதிநிதிகளுக்கும் நாடாளுமன்ற உறுப்பினர்களும் இந்நிகழ்வில் கலந்துகொள்வர். ஊடகத்துறையை சேர்ந்தவர்கள் மற்றும் பொதுமக்கள் அனைவரையும் நிகழ்வில் கலந்துகொள்ளுமாறு தமிழ் ஊடகவியலாளர் ஒன்றியம் அழைப்பு விடுத்துள்ளது.

ஊடகவியலாளர்களான ஐயாத்துரை நடேசன் 2004ஆம் ஆண்டு மே மாதம் 31ஆம் திகதி மட்டக்களப்பிலும் தர்மரட்ணம் சிவராம் 2005ஆம் ஆண்டு கொழும்பிலும் இராணுவ ஒட்டுக்குழுக்களால் படுகொலை செய்யப்பட்டமை குறிப்பிடத்தக்கது.